Վերջին երկուսն Իսպանիայի հավաքականի կազմում նվաճել էին 2010թ. Աշխարհի չեմպիոնի կոչումը, իսկ ահա Մեսսին Արգենտինայի հավաքականի հետ ձախողվել էր ՀԱՀ-ում: Բայց դա չխանգարեց Լիոնելին կրկին լավագույնը ճանաչվել մոլորակում: Մեսսին հիանալի մրցաշրջան անցկացրեց «Բարսելոնայում», որի կազմում բավական արդյունավետ խաղ է ցուցադրում:
Հիշեցնենք, որ այս տարի առաջին անգամ միավորվել են «Ֆրանս Ֆուտբոլի» կողմից սահմանված «Ոսկե գնդակի» (այս մրցանակը տրվում էր Եվրոպայի լավագույն խաղացողին) եւ ՖԻՖԱ-ի տարվա լավագույն խաղացողի տիտղոսները:
Ահա թե ովքեր են մինչ այս նվաճել աշխարհի լավագույն ֆուտբոլիստի կոչումը.
| Թ | Ֆուտբոլիստ | Երկիր |
| 1991 | Լոթար Մաթեուս | Գերմանիա |
| 1992 | Մարկո վան Բաստեն | Հոլանդիա |
| 1993 | Ռոբերտո Բաջո | Իտալիա |
| 1994 | Ռոմարիո | Բրազիլիա |
| 1995 | Ջորջ Վեա | Լիբերիա |
| 1996 | Ռոնալդո | Բրազիլիա |
| 1997 | Ռոնալդո | Բրազիլիա |
| 1998 | Զինեդին Զիդան | Ֆրանսիա |
| 1999 | Ռիվալդո | Բրազիլիա |
| 2000 | Զինեդին Զիդան | Ֆրանսիա |
| 2001 | Լուիշ Ֆիգու | Պորտուգալիա |
| 2002 | Ռոնալդո | Բրազիլիա |
| 2003 | Զինեդին Զիդան | Ֆրանսիա |
| 2004 | Ռոնալդինյո | Բրազիլիա |
| 2005 | Ռոնալդինյո | Բրազիլիա |
| 2006 | Ֆաբիո Կանավարո | Իտալիա |
| 2007 | Կակա | Բրազիլիա |
| 2008 | Կրիշտիանո Ռոնալդու | Պորտուգալիա |
| 2009 | Լիոնել Մեսսի | Արգենտինա |
| 2010 | Լիոնել Մեսսի | Արգենտինա |
Լավագույն ֆուտբոլիստուհու կոչումը կրկին նվաճեց բրազիլուհի Մարտան, ով արդեն 5-րդ անգամ է ստանում այս մրցանակը:
Լավագույն մարզիչ
Այս նոմինացիայում հաղթեց Ժոզե Մոուրինյոն, ով ներկայումս գլխավորում է Մադրիդի «Ռեալը»: Պորտուգալացի մասնագետի գլխավորությամբ Միլանի «Ինտերը» դարձավ Չեմպիոնների լիգայի 2009/10թթ. Խաղարկության հաղթող: Բացի այդ, Մոուրինյոյի նախկին թիմը հաղթեց Իտալիայի առաջնությունում եւ գավաթի խաղարկությունում: Լավագույն մարզիչների լավագույն եռյակում էին նաեւ Վիսենտե դել Բոսկեն (Իսպանիայի հավաքական) եւ Պեպ Գվարդիոլան («Բարսելոնա»): Լավագույն կին մարզիչ ճանաչվեց Գերմանիայի կանանց հավաքականը մարզող Սիլվիա Նեյդը:
Լավագույն գոլ
ՖԻՖԱ-ի պաշտոնական կայքում ներկայացվել էին 2010թ. լավագույն 10 գոլերը եւ ֆուտբոլասերների քվեարկության արդյունքում հաղթել է Թուրքիայի հավաքականի խաղացող Համիտ Ալտինտոպը, ով «Եվրո-2012»-ի ընտրական փուլում բավական գեղեցիկ գոլ է խփել Ղազախստանի ընտրանու դարպասը:
Խորհրդանշական հավաքական
Տարվա խորհրդանշական հավաքականում հայտնվեցին «Բարսելոնայի», «Ռեալի» եւ «Ինտերի» խաղացողները.
Դարպասապահ
Կասիլյաս («Ռեալ»)
Պաշտպաններ
Պույոլ («Բարսելոնա»), Պիկե («Բարսելոնա»), Լուսիո («Ինտեր»), Մայկոն («Ինտեր»)
Կիսապաշտպաններ
Խավի («Բարսելոնա»), Ռոնալդու («Ռեալ»), Ինյեստա («Բարսելոնա»), Սնեյդեր («Ինտեր»)
Հարձակվողներ
Մեսսի («Բարսելոնա»), Դավիթ Վիլյա («Բարսելոնա»)
Արդար խաղ
Այս մրցանակին արժանացավ Հաիթիի կանանց պատանեկան հավաքականը, որը չնայած երկրում տեղի ունեցած աղետալի իրադարձություններին՝ շարունակել էր ելույթները միջազգային ասպարեզում:
