ՊԵԿ-ի առեւտրային գաղտնիքը եւ հայ կանանց "ողբերգությունը"

Վիճակագրական տվյալների համաձայն` կինը տարեկան օգտագործում է 2,5 կգ  կոսմետիկա: Հայաստանյան շուկայում կոսմետիկական միջոցների պակաս չկա: Այս ապրանքատեսակը ամենից շատ սպառվողներից է: Բայց արդյո՞ք անվտանգ  է այն: Պարզվում է` ոչ այնքան:

Տոնավաճառներում և գետնանցումներում շատերն են տեսել "լցնովի  ֆրանսիական օծանելիք" գրությունը: Թե որքանով է այն անվտանգ և ի՞նչ որակ ունի, դա գիտեն  նույնիսկ մեկ անգամ օգտագործողները:

Ըստ Էկոնոմիկայի նախարարության շուկայի և սպառողների շահերի պաշտպանության պետական տեսչության` կոսմետիկայի շուկայում վերջին անգամ  ստուգում արվել է 2009թ:

Այն ժամանակ հայտնաբերված խախտումները մեծ մասամբ մակնշմանն են վերաբերել: Սակայն դրանից հետո շատ ջրեր են հոսել: Այժմ շատ ներկրողների առաջ  ոչ դրական իմաստով  կանաչ  լույս է վառում  կառավարության այն որոշումը, որի համաձայն ընթացիկ ստուգումներ չեն արվում այն տնտեսավարողների մոտ,  ում տարեկան շրջանառությունը  չի  գերազանցում 70 մլն դրամը:

Նրանց մոտ ստուգում կարող է անցկացվել միայն վարչապետի թույլտվությամբ: Շուկայում կոսմետիկակական միջոցների  առատությունից  առանց  հաշվելու էլ ակնհայտ է, որ  ներկրողի համար տարեկան 70 մլն դրամը հատելը  դժվար չէ:

Բայց … Բանն այն է, որ  թաքցվում է իրական շրջանառությունը, և երկրորդ`   պարտադիր սերտիֆիկացումից  խուսափելու համար ապրանքը ներկրվում է  փոքր խմբաքանակներով: Բանն այն է, որ մեկ անձը մինչև 150 հազար դրամի, կամ մինչև 50 կգ ապրանք  կարող է ներկրել  առանց սերտիֆիկացման: 

Զարմանալի է, բայց փաստ. շուկայի և սպառողների շահերի պաշտպանության  պետական տեսչությունը չունի ճշգրիտ տվյալներ այն մասին, թե կոմետիկա  և պարֆյումերիա ներկրող  քանի ընկերություն կա:

Այդ տվյալները տեսչությանը ՊԵԿ-ը որպես առևտրային գաղտնիք չի տրամադրում:  Այս պարագայում պարզ  է դառնում, թե  որքանով են վստահելի ստեպ-ստեպ արվող ստուգումները, և որքանով են անվտանգ վաճառվող  կոսմետիկական միջոցներն ու պարֆյումերիան: 

Նույնիսկ պատասխանատու կառույցները չեն ժխտում, որ դրանց մեծ մասը   կեղծված է:  Ալերգիկ, աչքի, աղիքային  հիվանդություններ. ահա թե ինչ կարելի է "վաստակել" կեղծ կոսմետիկայի օգտագործումից: 

Եվ ուրեմն` սպառողներին մնում է ապավինել միայն զգոնությանը և կեղծվածն ու  ոչ կեղծվածը տարբերակելու սեփական հմտությանը: Ինչպես ասում են` խեղդվողների  փրկությունը խեղդվողների ձեռքում է:  
henaran.am